Oft finnst mér eins og ég gæti verið að gera eitthvað miklu merkilegra við tíma minn en ég geri. Ég eyði t.d. oft allt of miklum tíma í að horfa á einskis nýtt blaður í sjónvarpinu, þegar ég gæti verið að lesa eða skrifa eitthvað sniðugt. Aldrei fer ég í leikhús, en fer reglulega á barinn. Mig minnir að ég hafi haft áætlanir um betra líf fyrir nokkrum mánuðum. Áætlanirnar snertu meðal annars mataruppskriftir og menningarlega afþreyingu. Mér tókst að halda mig við plönin í u.þ.b. mánuð, ég fór einu sinni á danssýningu, bakaði tvisvar brauð og prófaði nokkrar nýjar uppskriftir. Síðan hefur allt verið við það sama. Ókennilegir pastaréttir sem ég slafra í mig fyrir framan sjónvarpið, nærri leikhúsum kemst ég ekki en að skoða auglýsingaspjöldin, og ég er aftur farin að fylgjast með TopModel.