Haldiði að ég sé ekki bara komin á rússneska feisbúkkið. Sem er nótabene nákvæmlega eins og ameríska feisbúkkið, bara á rússnesku. Þar er ég meðal annars búin að grafa upp fólk sem ég hélt að væri löngu búið að gleyma mér, en það urðu þessir litlu fagnaðarfundir. Lífið er ótrúlegt stundum.

Ég er að reyna að ná mér eftir tvær vikur í Rús. Er enn í gírnum "á hverju kvöldi skal drekka minnst einn áfengan drykk, því þetta er búinn að vera svo stressandi dagur og svo er það ókeypis af því að við erum í vinnunni". En ég er víst komin aftur heim og í skólann, svo það er vissara að leggja þennan ósið á hilluna. Armen bjó til sushi í kvöldmat og það misheppnaðist eitthvað (mér fannst það fínt) svo hann stakk upp á að við drykkjum bara helling af rússneska kampavíninu sem ég hef verið að drösla heim með mér. Svo lognaðist hann bara út af eftir tvö glös. Veit ekki alveg hvað þetta á að þýða.

Vá, það er nærri mánuður síðan að ég skrifaði seinast. Um er að kenna gífurlegum önnum og algeru innblástursleysi. Ég hef verið svo andlaus að ég hef ekki einu sinni nennt að hringja í fjölskylduna mína undanfarið.

Kom heim frá Rússlandi í gær ásamt fríðu föruneyti ungs fólks, sem nú hefur kynnst veröld, sem það grunaði ekki að væri til. Eins og venjulega finnst mér ég hafa þyngst um að minnsta kosti tvö kíló á einni viku, og þar sem að ég er á leiðinni þangað aftur á sunnudaginn, er aldrei að vita nema ég geti bætt á mig eins og einu kílói eða svo í viðbót. Svo tókst mér að týna vísakortinu mínu, í fyrsta sinn held ég bara nokkurn tímann. Nema mig minnir reyndar að ég hafi annað hvort týnt því eða það runnið út, þegar ég bjó í Pétursborg í gamla daga. Borgin atarna var söm við sig í þessari ferð. Grá, reykmettuð og móskuleg á allan hátt. Rakastig í lofti var yfirmáta hátt að vanda og 5 stiga hiti var eins og 15 stiga frost. Annars að mestu leyti ágætt að vera þarna, gaman að hitta stelpurnar og svona.